L-EWWEL QARI
Qari mill-Ewwel Ktieb tas-Slaten
1 Slat
18, 42-45
Elija tela’ fuq il-quċċata tal-Karmel,
inxteħet fl-art,
u qiegħed wiċċu bejn irkobbtejh.
U qal lill-qaddej tiegħu:
!Itla u ħares lejn in-naħa tal-baħar.”
Dak tela’, ħares u qal:
“Ma hemm xejn.”
Qallu:”Erġa’ mur seba’ darbiet.”
Mas-seba darba qabad igħajjat:
“Ara, hemm sħaba daqs keffa ta’ id ta’ raġel,
tielgħa mill-baħar.”
Qallu Elija: “Mur għidlu lil Aħab:
“Arma ż-żwiemel u inżel,
qabel ma tilħqek ix-xita.”
Malli dan, is-sema swied,
qam ir-riħ,
u bdiet nieżla xita kbira.
Il-Kelma tal-Mulej.
Salm 14
RIT: Nimxu warajk kull fejn teħodna, Verġni Maria.
Mulej, min igħammar
fid-dar tiegħek?
Min joqgħod fuq il-għolja mqaddsa tiegħek?
RIT…
Min jgħix bla ħtija
u jagħmel it-tajjeb,
min jgħid is-sewwa f’qalbu;
min ma jqasqasx bi lsienu,
ma jagħmilx deni lil ġaru, u
ma jgħajjarx lil għajru.
RIT…
Min ma jqisx lill-bniedem il-ħażin,
imma jweġġah lil dawk li jibżgħu
mill-Mulej.
RIT…
Ta’ kelmtu l-Mulej fil-wegħdiet tiegħu kollha,
twajjeb f’dak kollu li għamel.
Iwieżen
il-Mulej lil kull min se jaqa’,
iqajjem lil kull min hu mitluq.
RIT…
IT-TIENI QARI
Qari mill-Ittra ta’ San Pawl Appostlu lill-Gallatin
Gal 4: 4,7
Ħuti, meta waslet il-milja
taż-żmien,
Alla bagħat lil Ibnu, imwieled
minn mara, imwieled taħt il-Liġi,
biex jifdi lil dawk li kienu taħt
il-Liġi, biex ikollna l-adozzjoni ta’
wlied.
U għax intom ulied, Alla
bagħat l-Ispirtu ta’ Ibnu f’qalbna jgħajjat:
“Abbà! Missier!”
U hekk m’intix iżjed ilsir, iżda iben:
u jekk iben, werriet ukoll
bil-grazzja ta’ Alla.
Il-Kelma tal-Mulej.
Hallelujah. Halleluljah.
Hienja dawk li jisimgħu l-kelma t’Alla u jħarsuha
Hallelujah.
L-EVANĠELJU
Qari mill-Evanġelju skont San Ġwann
Ġw 19, 25-27
Kien hemm wieqfa ħdejn is-salib ta’ Ġesù
ommu, oħt ommu, Marija ta’ Kleofa,
u Marija ta’ Magdala.
Mela kif Ġesù lemaħ lil ommu
u lid-dixxiplu li kien iħobb wieqaf ħdejha,
qal lil ommu:
“Mara, hemm hu ibnek.”
Imbagħad qal lid-dixxiplu:
“Hemm hi ommok.”
U minn dak il-ħin id-dixxiplu
ħadha għandu.
Il-Kelma tal-Mulej.